Velkomen, Hans Inge!

I går starta Hans Inge Myrvold frå Kvinnherad i jobben som ny dagleg leiar i Næringshagen i Ullensvang – og me er kjempeglade for å ha han med på laget!

Hans Inge har mykje erfaring å ta med seg inn i rolla. Han har vore ordførar i Kvinnherad, han har representert Senterpartiet på Stortinget, og han har òg drive eigen bedrift. Med andre ord: Han kjenner både næringslivet og politikken frå innsida – ein kombinasjon som blir gull verdt for næringshagen og regionen vår.

– Eg er både ydmyk og takksam for tilliten, og ser verkeleg fram til å bli betre kjent med næringslivet i Hardanger og regionen rundt, seier Hans Inge sjølv.

Ny dagleg leiar, Hans Inge Myrvold på sitt nye kontor i Odda.

Han ser spesielt fram til satsinga med å inkludere Kvinnherad i næringshagen:– Dette er ein av dei mest verdiskapande regionane i landet. Å få bidra til vidare vekst, fleire arbeidsplassar og eit endå meir attraktivt bu- og arbeidsområde er eit privilegium, fortel han.

Fyrste arbeidsdag vart tilbrakt på Smelteverket i Odda, der han fekk helse på både nye kollegaer og dei andre i kontorfellesskapet.

Me i Næringshagen gler oss verkeleg til å sjå kva me kan få til saman framover.

Velkommen til oss, Hans Inge!